Argigarria da 2014ko eta 2024ko datuak alderatzea. Aurrekontua 51.511.198€-tik 85.569.172€-rakoa izan da aldi horretan. Denbora horretan, EINek erregistratutako kriminalitate-tasaren arabera, mila biztanleko delituak 43,6 izatetik 50,9 izatera igaro dira. Zaila da azaltzen gastuan izandako bilakaera proportzionala denik kriminalitatea deitzen dioten horren hazkunde errealarekin. Mila biztanleko delituen datu zehatza segurtasunaren aldeko posizioetatik erabili izan da azken urteotan. Interesgarriagoa iruditzen zaigu beste irakurketa bat proposatzea. Zaila da ulertzen, izan ere, balio horien igoera eskaxa, kode penalaren gogortze testuinguru batean, krisi ekonomikoak eragindako hondamendi sozial eta gehiegizko presentzia polizialaren testuinguruan.

Lurraldean dauden gorputz guztiak batuz gero, poliziaren presentzia zazpi agentekoa da mila biztanleko. Salva Díezek, Gobernuko Barne Departamentuko zuzendari nagusiak, duela gutxi harro adierazi zuen bezala: «Nafarroak du Estatuko biztanleko polizia ratiorik handiena». Deigarria da gero eta dotazio handiagoen eta delinkuentzia-indize txiki samarren arteko kontrastea, alderdi guztiek aho batez onartu dutena. Enplegu publikoaren bidez integratzeko funtzio sozialaz haratago, ez dugu gastuaren etengabeko hedapen horren arrazoizko justifikaziorik aurkitzen. Europan zehar dabilen militarizazioak eta korronte sekuritarioak berebiziko garrantzia hartu dute gure buruzagiengan.